Лоамара юрташта юкъе йоккхагIчарех я Хьули.
ХIанз Хьули уллача йоккха хьу хиннай, эрз а болаш, хьакхарч а лелаш. Хьулхой боккхийча наха дувцар, гIалгIай СибрегIа бахийталехьа Хьуле йоккхача хений гударгаш ягIар, яхаш. «Хьу» яхача дешах хьахиннай керда хьахиннача юрта цIи «Хьули», аьнна. Хьули шиъ я – дехьареи сехьареи.
Эггара хьалха Хьуле вах хайнар Хаз ва. Хаз ше Аьгекхалара хьаваьнна хиннав. Аьгекхала чу цхьа хьаст мара бац. Из хьаст «Хаза хьаст», аьнна, оалаш ба. Цу хьаста тIехьашка ягIа Хаза гIала. Овшанаькъан йоI а йодаяь Аьгекхалера дIаваха, Хьули улла моттиг хоза а хийтта, цига вах Iохайнав Хаз.
ТIехьагIа цунна тIавенав Или. Или ше ЦIеча-Ахкара хьаваьннав. ЦIеча-Ахкара, дов а хинна, Кхерахьа дIаваха, вах хайна хиннав Или. Или, кхийна къоньгаш а болаш, из Кхерахье а цатоаш, чIоагIа хиннав. Иле каш а Кхерахьа да. Иле хьу а Кхерахьа я. Кхерахьа ший дакъа а долаш ваьхав из. Иле цон я ТIоухаре (йоачан хилча тIо ахка а ухаш лоам ба из). Цига никъ ба.
ХIанз Iарамхи-курорт йолча Зовра-гIала ягIаш хиннай. Кхийна къоньгаш а болаш хиннав Зовра, цу гIала чу готта а йолаш, кхы а хиво кхá доха а даь хиннад. Из Зовра а хьаволаваьв Хазас, вошалá дакъа а деш.
ВиълагIа Хьуле вах хайнав Борз. Из пхе хиннав. ХIанз ХIирий-мехка уллача Санибара Чахка венав. Цу хана Санибе гIалгIай бахаш хиннаб.
Кхартера хьаваьнна Кхоартой Амхьада Дудик яхаш цIихеза герза пхьар хиннав (моакхаза топаш, тепчаш еш хиннай цо). Из Кхартера Дошхьакъле вах хайнав. Цигара Хьуле хьавенав. Цун тIехьенах хьабаьннаб Амхьаданаькъан.
Цига Харс а венав, Гаркха а венав. Иштта хьавIашагIкхийттад Хьулхой тайпа.
Или гIала Хаза гIалах дIатIахетта ягIа. Или гIалах хетта ягIа Борза гIала. Амхьаднаькъан, Зовранаькъан дехьарча Хьули баьхаб.
ТIехьагIа Гаркх Гаркхе вах хайнав, Харса-къоньгаш Лаьжге бах дIабахаб.
Хьулхой тайпа ялх даькъах латт: Хазанаькъан, Илинаькъан, Зовранаькъан, Борзанаькъан, Чахканаькъан, Амхьаданаькъан.
Хьулхоех хьабаьннаб дуккха цIихеза йоазонхой, Iилманхой, эпсараш (ши инарал а ва царна юкъе), спортсменаш.
Коазой Нурдин